官方微信 官方微博
当前位置: 首页 > 云山论剑 > 正文

珠江嘅“沙”

信息时报 | 李月婷 | 2019-08-16 16:09:55

白话广州


  上文提到嘅珠江景观带设计规划,除咗榕树生活场景之外,仲提到要“保护江心岛的生态原真性”。呢度提到两个江心岛,包括北帝沙同大吉沙。呢两个“沙”大家可能都唔系咁熟,佢哋嘅知名度,梗系唔及老城区里边嘅其他“沙”。

  广州人习惯将珠江称为“海”,“过江”叫做“过海”,“江边”又叫“海皮”。珠江上边嘅岛叫做“沙”,因为呢啲岛多数由河沙冲积而成。广州最出名嘅“沙”,有沙面、太平沙、大沙头、二沙岛、海心沙、磨碟沙、大坦沙、丫髻沙等等。其实以前大沙头就系个江心岛,只不过佢后来同陆地相连,已经睇唔出系个岛。佢嘅“兄弟”二沙岛以前叫“二沙头”,依家大家中意简称“二沙”,佢之前系珠江边一个渔村。

  最有历史感嘅应该系“沙面”,佢以前亦系珠江中间嘅一个岛,后来又连起陆地。依家大家觉得佢系个“岛”其实系人工造出来嘅——当年沙面成为租界之后请人挖咗条河道,重新将沙面同沙基分开,将沙面又变成一个岛。

  沙面、大沙头、二沙岛,以前系广州最出名嘅“三沙”,不过讲到摩登时尚就不及后来居上嘅海心沙。亚运一夜成名之后,海心沙变成仅次于广州塔嘅新地标。最近呢度有意大利文艺复兴时期嘅展览,戴副VR眼镜,仲可以同“达芬奇”倾偈添。


  ◎李月婷 媒体人


信息时报社地址:广东省广州市广州大道南83号汇美商务中心四楼

信息时报社 版权所有(C) 粤ICP备14002173号-1 爆料电话:020-34323111 QQ:800023111 官方微博:@ 信息时报

举报及投诉电话:(020)34323133 邮箱:xxsb_gz@163.com

网上有害信息举报专区