官方微信 官方微博
当前位置: 首页 > 云山论剑 > 正文

识食荔枝无热气

信息时报 | 梁倩薇 | 2019-06-23 22:56:19

 白话广州


  而家正系荔枝上市嘅时节。但据新闻话,早前印度有103名儿童突然死亡,怀疑同进食当地嘅荔枝有关——空肚,加上食得太多,诱发荔枝病同脑炎。

  荔枝呢种水果,喺全球都有广泛分布,但如果话广州人对佢嘅品性更加熟悉,一啲都唔为过。荔枝素被誉为“岭南佳果”,喺广州嘅增城、海珠、从化等地都有种植,而且品类众多,包括著名嘅挂绿、妃子笑、糯米糍、淮枝、水晶球等等。所以,广州街坊唔单止中意食荔枝,亦懂得个中利弊,知道点样去应付佢嘅缺点。

  就讲荔枝病,广州民间有一句老话,叫做“一个荔枝三把火”,意思系,岭南水土湿热,与荔枝嘅热性相同,所以食得多,易诱发中医所讲嘅“热症”。呢个说法亦讲明,广州人好早就摸透咗荔枝嘅寒热性质,并学识防范了。

  此外,广州人亦会利用独门健康秘笈“煲汤”去平衡荔枝嘅热性。每逢荔枝当造,广州师奶就会用生地煲瘦肉;用青红萝卜煲粟米;或者整碗香草绿豆沙来下一下火。而且,每次食荔枝之前,阿妈都会教落:“要开啲盐水浸下啊,咁就无咁热气啦。”

  呢啲民间经验,一代代口口相传,早已成为岭南生活智慧嘅一部分。佢系街坊口福嘅保证,亦系广州人善于利用自然、同环境和谐相处嘅生动佐证。


  ◎梁倩薇 编辑


信息时报社地址:广东省广州市广州大道南83号汇美商务中心四楼

信息时报社 版权所有(C) 粤ICP备14002173号-1 爆料电话:020-34323111 QQ:800023111 官方微博:@ 信息时报

举报及投诉电话:(020)34323133 邮箱:xxsb_gz@163.com

网上有害信息举报专区