官方微信 官方微博
当前位置: 首页 > 云山论剑 > 正文

“世界波”非偶然

信息时报 | 梁倩薇 | 2019-06-02 20:39:42

  白话广州


  学生足球比赛向来都无乜人关注。但最近,富力杯决赛却成咗热门话题:44分钟嘅时候,江南二小嘅黄雨齐同学喺中圈附近开出任意球,皮球旋转住划过半场,应声入网,其力度之准,角度之刁,用“世界波”来形容一啲都唔过分。

  小学生踢出嘅“世界波”,并唔偶然,可以被视为广州蓬勃开展校园足球运动嘅成果之一。广州作为中国首批足球改革试点城市,截至旧年底,净系“全国校园足球特色学校”就已经有137所之多;打一届市级中小学校园足球联赛”,参加嘅学生可以达到3万人。其中出几个精英,又有咩奇怪呢?

  广州一向系足球热土,早喺1900年前后,足球就从香港传入。到咗二三十年代,广州嘅球队已经遍地开花,以“灵活、精悍”著称嘅南派风格亦开始形成。到咗20世纪末,广州人更将商业同体育结合,成立咗中国首家股份制职业足球俱乐部——广州太阳神足球俱乐部。因为有一代代人厚实嘅积累,广州嘅足球事业先会咁风生水起。而李惠堂、古广明、容志行、区楚良、彭伟国、彭伟军等名将亦各领风骚,喺每一个时代推动住足球事业嘅发展。

  如今,黄雨齐同学嘅一脚“世界波”,令我哋睇到广州足球嘅新希望。但愿,喺新嘅培养体制之下,新一代接班人将再创辉煌。


  ◎梁倩薇 编辑


信息时报社地址:广东省广州市广州大道南83号汇美商务中心四楼

信息时报社 版权所有(C) 粤ICP备14002173号-1 爆料电话:020-34323111 QQ:800023111 官方微博:@ 信息时报

举报及投诉电话:(020)34323133 邮箱:xxsb_gz@163.com

网上有害信息举报专区