官方微信 官方微博
当前位置: 首页 > 云山论剑 > 正文

沙面旧时光

信息时报 | 李月婷 | 2019-05-12 18:21:17

白话广州


前嗰排荔湾区出咗个规划,准备将沙面西堤到海珠桥一带打造成一个慢行系统。其中变化最大嘅应该就系沙面,以后唔可以开车入岛。

沙面嘅历史唔使讲喇,小朋友都知道佢以前系英法租界。沙面原先系珠江中间嘅一个岛,海岸南移之后同六二三路连埋一齐。沙面成为租界,系因为佢嘅特殊位置。当年十三行火烛,外商冇咗“根据地”,于是就睇啱沙面呢个冇乜人住而且又靠近珠江嘅小岛。依家岛前边嘅沙基涌,就系喺嗰个时候挖出来嘅。沙面系租界,所以老百姓嘅活动范围就集中喺沙基呢一段。

旧时长堤夜生活丰富,大致分为三段。最东边嘅系大沙头到海珠桥嘅东堤,据讲当年呢度系有钱人嘅“乐园”。而海珠桥到沙基纪念碑呢段市井风情浓厚,有唔少卖水果、卖凉茶、卖糖水嘅摊贩。

最静局嘅就系最西边嘅沙基段,来呢度嘅多数系啲冇乜消费能力嘅人。关于呢一段,有句广州话歇后语——“沙基睇相”。当时呢度聚集咗唔少睇相佬,佢哋未有客时就喺度念口诀,有人想帮衬就讲“分文不受赠看左掌”。睇紧相时,如果后边有客,睇相佬就三几句打发前边嘅人然后大声叫“第位”(第二位)。所以,“沙基睇相”嘅下一句就系“第位”喇。系唔系好有意思呢?


  ◎李月婷 媒体人


信息时报社地址:广东省广州市广州大道南83号汇美商务中心四楼

信息时报社 版权所有(C) 粤ICP备14002173号-1 爆料电话:020-34323111 QQ:800023111 官方微博:@ 信息时报

举报及投诉电话:(020)34323133 邮箱:xxsb_gz@163.com

网上有害信息举报专区