【我在广州】休息日仲搏命练,为嘅就系义务救援

by 信息时报 | 封剑浪人冯今宁 | 2015-09-01 10:24

8月31日,阴雨。


寻日周末,例牌要去转一转,睇睇广州人喺度玩嘀乜?嚟到中山八路嘅青年公园,正落紧毛毛细雨,公园内清新嘅空气沁人肺腑。“注意检查绳索!”“检查绳索!”“伸直双脚!”“训晒个身落去!”一连串凌厉嘅口令,吸引咗我嘅视线。只见一班后生仔女喺度练绳索......


1.jpg

“你好,你哋喺度做...?”

“我哋系广东救援辅助队嘅,喺度练绳索技术,呢个系救援中经常使用嘅技术。”

“广东救援辅助队?系志愿者组织?”

“系啊,系由社会热心人士自愿组成嘅救急、救援和救伤辅助服务嘅志愿组织,我哋喺2007年就成立嘅。”


2.jpg


“哦...八年嘞啵?”

“系啊,八年抗战啊,哈哈哈。我哋从冇到有,慢慢壮大啦。”

“呢八年,你哋有冇做咩重大嘅救援工作啊?”

“梗喺有啦,近年嚟粤东、粤西北几次特大灾害,我哋都有派人参加救援服务噶。”


3.jpg


“周末人哋都去休息,游山玩水,你哋就喺度练到身水身汗,真系唔话得咯。”

“系啊,我哋呢班志愿者都系好认真噶,为咗能够安全救援同自身嘅安全,我哋对队员都经过严格嘅训练噶。今日除咗呢度训练绳索之外,有一大半去咗白云山嗰边,练水上抢险呢。”

“睇你哋个个都无算好后生嘞啵?咁你哋嚟训练,屋企嘀细路仔点算啊?”

“我仲好彩,未有小朋友,你问佢哋啦。”

“我哋嘀细路哥,俾屋企爷爷嫲嫲或者姨妈姑爹凑咯。”


4.jpg


“我好好奇,你哋点解会嚟做呢样嘅志愿服务呢?”

“以前都有玩开绳索嘅,后嚟听讲有呢样野搞,咁咪约埋一班热心嘅爱好者一齐咯,平时可以一齐练习,又需要嘅时候又可以服务社会,都算一举两得咯。呵呵呵!”

“你哋宜家有几多人啊?”

“全省都有几千人噶,我哋分咗好多个专业队嘅,我哋呢队系‘水抢’即系水上抢险救援。”


5.jpg


“你系边度人啊?贵姓啊?”

“我系广州人,地道嘅广州人,我姓李,木子李。”

“广州边度噶?”

“广州东山大嘅。”

“你知道嘅地道广州话系边句啊?”

“骑呢怪,骑呢咯。”

“哈哈哈!好骑呢啊。”


6.jpg


“今日落雨,你哋要注意安全啊。”

“会嘎啦,我哋做足安全措施嘎啦,喺雨天练习系我哋嘅课目之一啊。”


广州人做公益系出咗名嘅,喺过去嘅几十年嚟,每当遇到自然灾害,广州人都义不容辞咁伸出援手。宜家呢班后生仔女更奋身做义工,真系顶呱呱!


返回顶部
信息时报电子报